據悉，單嘢爆咗出街後，邱副嘅老細、運房局局長Eva鄭汝樺尋日同發叔通電話，承諾幫村民加快審批牌照，配合村民十月限期前搬遷。唔知Eva係咪聞到（火羅）味，所以去幫邱副補鑊冧番發叔呢？

菜園村申領復耕牌照總共有八十六宗，涉及三十六個大家庭，其中二十個家庭嘅申請被政府彈番轉頭，當局本來只願繼續同七個家庭討價還價，但前日邱副放村民飛機事件曝光後，其餘十三個家庭又可以望到一絲曙光。

菜園村支援組成員葉寶琳尋日話當局之前對開唔開三方會議，同埋應該一次過見晒二十戶家庭定係只見七戶，都扭扭擰擰，依家竟然突然轉性，邱副約實今日朝早同大家開三方會議，如果喺審批牌照準則達成共識，仲肯即刻同二十戶家庭「面試」添。

政府突然之間變得咁好相與，唔知同Eva打電話畀發叔有冇關連呢？