私隱專員吳斌喺年初突然以個人聲明方式爆料，話坐到今個月三十一號就卸任走人，當時官場有人思疑佢只係向政府出招，將不獲續約美化成自行選擇唔撈。吳斌在位時鍾意同政府玩嘢，估唔到臨別在即都要再次喺電台嘅「烽煙」節目爆料，令政府難堪，真係鬼打鬼。
吳斌話下禮拜六就卸任，佢想交棒都唔知交畀邊個，仲話自己○五年履新時，上手鄧爾邦已離職六個幾月，佢唔想事件翻版。佢咁講，畀人嘅感覺一係暗寸政府物色接任人歎慢板、冇效率，搞到佢要交空棒，一係就反擊當局遲遲唔公布人選，冇嚟規矩。
正所謂一條鎖匙敲唔響，政府同吳斌唔咬弦，梗係唔單止政府有問題啦。兩名前任專員劉嘉敏同鄧爾邦在職期間都涉及濫用公帑，被指其身不正，吳斌接手後，公署一樣屢傳醜聞，上年底更被審計報告點名狠批「大花筒」亂用公帑同行政混亂，好似租用貴價辦公室、處理投訴唔達標，同埋公幹應酬開支冇準則咁，其中吳斌亦係矛頭焦點，被指出差唔住接待單位提供嘅免費酒店而另租酒店亂使錢。爛燈留嚟做乜？政府索性唔好為吳斌物色繼任人，摺咗公署算罷啦！