賭王何鴻燊嘅三房兒子何猷啟舊年生日同孖生家姐超蓮一齊開咗個十八歲盛大生日會，今年十九歲生日就冇乜公開慶祝活動，但前日（二十號）佢生日翌日，咁啱喺置地撞到佢，當時佢聽住音樂，兩手fing fing，着住件祖雲達斯龍門保方嘅球衣，襯條白色籃球褲同跑鞋，咁sporty，唔通去做運動？
本來想上前同佢打招呼，點知佢一個箭步掟彎，再大踏步行去隔籬中建大廈嘅HMV，睇咗冇耐，見佢㩒㩒個電話，就即刻放低啲碟，搭電梯落去中建大廈嘅出口，一出門口佢就同一個長髮少女相視而笑，睇真啲，原來係佢女友Mina。
猷啟跟手接過女友手上嘅兩個紙袋，再拖到實過對面馬路，齊齊上七人車鬆人。
早排喺東華三院個活動撞到三太，講開Mina成日畀人指指點點，三太即時大讚Mina斯文又夠低調，仲好樂意Mina多啲去佢哋屋企坐，習慣吓佢哋嘅生活。三太咁開通都有條件，就係拍拖一定唔可以影響學業。