米老鼠解釋話太遲先確認出席簽名會，所以趕唔切通知書迷同朋友，先搞到場面咁冷清。不過喺米老鼠隔籬搞簽名會嘅孔教學院院長湯恩佳就好受歡迎，大批「80後」青年打晒蛇餅咁搵佢攞簽名，唔知情嘅仲以為佢哋等G模添！米老鼠話唔會妒忌，因為已經過咗會有呢啲負面情緒嘅年紀，但如果要佢學G 模咁吸客，佢就講笑咁話最多只會除咗件面衫，應該都冇乜吸引力，認真抵死！

姚珏同小朋友講故事

除咗冇讀者賞面，主辦單位都唔係點理米老鼠。貿發局總裁林天福冇去視察簽名會嘅情況，但就去咗睇「名人講故事」環節。尋日同小朋友講故事嘅係著名小提琴家姚珏，佢講咗個同樂器有關嘅小故事，在場嘅小朋友聽得不知幾投入，最後仲爭住同佢合照添！相比米老鼠中午嘅情況，簡直差天共地。米老鼠話聽朝仲會有一場簽名會，佢會叫啲朋友嚟撐場喎！