盛傳佢哋會由曾喺○六年循旅遊界參選特首選委會選舉嘅司馬文參選，而匯賢智庫亦唔敢鬆懈，派出牛津畢業嘅「尖子」新人劉應東應戰，希望搶番呢個本來就屬於佢哋嘅議席，睇嚟呢一場老外、尖子之戰都好有睇頭噃。

呢次補選係為咗填補匯賢智庫前薄扶林區議員陳岳鵬過檔特首辦做特別助理後造成嘅空缺。公文袋同社民連嘅「維園阿哥」任亮憲早就對呢個議席虎視眈眈，但係若果兩個民主派政黨都派人出選，就等於自相殘殺，所以兩黨一直有進行協調，而社民連就提出過用民調定勝負。

但聽聞公文袋覺得做民調喺時間同資源上唔可行，而且薄扶林中高產選民居多，照理公文袋嘅認受性應該比社民連高，再者佢哋衡量過，認為維園阿哥冇乜落過區，反而司馬文一直有喺區做嘢，知名度較高。經一輪拗手瓜後，兩黨尋日發表聯合聲明，表示經過協調磋商後，決定由公文袋派人出選。咁即係話，維園阿哥率先出局。

建制派撐匯賢智庫

無獨有偶，由立法會議員葉劉淑儀創立嘅匯賢智庫，尋日亦開記招介紹參選人，佢就係獲葉劉稱為「徒弟」、曾經喺○八年葉劉參選立法會時幫過手嘅牛津數學碩士劉應東。葉劉曾大讚劉應東同陳岳鵬一樣，後生、讀得書、勤力、肯花時間服務社區，而且一直有幫陳岳鵬手服務社區，所以支持佢參選。劉應東亦識做，回禮話「師傅」葉劉肯畀機會年輕人，不論成敗佢都會再接再厲。

雖然司馬文初步鍊贏咗維園阿哥，但面對地頭蟲劉應東挑戰，加上其他建制派唔派人出選下，劉應東極可能獲得其他建制派支持，所以呢場唔單止係老外鬥尖子，背後根本就係建制派同泛民嘅惡鬥，咁就要睇下邊個好打啲喇！