話時話，毒駕呢家嘢唔講得笑㗎，司機high藥後連阿媽都唔認得，畀架車佢揸，等同靠害途人。早排有個二十幾歲男子揸架跑車喺荃灣亂衝，失控撞向一架平治房車，再剷石壆先至停低，成架車撞爛晒。差人發現佢神情呆滯，口鼻都有白色粉末，九成九索咗Ｋ。

其實社會各界早就要求當局立例打擊毒駕，早排修訂醉駕條例時，有人提出將毒駕納入，呢個建議本來唔錯，可即時加重對毒駕嘅刑罰，以儆效尤。點知高官耍手擰頭，話要另設專案處理喎，一拖又拖咗幾個月。

依家政府終於肯做嘢嘞，正所謂亡羊補牢，未為晚也。可惜政府嘅方案漏洞百出。此話何解？嗱，按照政府嘅建議，警方首先要透過行為反應嚟鑑定司機有冇吸毒，即係警方截停架車後，叫司機沿直線行幾步，再睇吓佢嘅瞳孔有冇唔正常反應，當司機通唔過行為測試，先至安排驗血或小便，但警方唔會隨機測試司機嘅口腔液。

太一叮斗膽講一句，咁樣走馬觀花，實在係太牙煙，分分鐘放過嗰啲老牌道友。正如有前線交通警話齋，毒癮深嘅人有抗藥性，習慣藥物效力，吸食後表面上冇異樣，好容易測試過關，但唔等於佢哋遇到突發交通事故會有反應。所以話，當局咁樣做等同放虎歸山。

有議員直言，警方要有權隨機執法，至可以阻嚇毒駕。講得冇錯，警方查醉駕，可以隨機抽查司機吹波波，所以好多人飲咗酒都唔敢揸車。現時好多國家查毒駕都授權警方對司機做快速口腔液測試。其他地方可以做，香港點解唔可以？無論醉駕定係毒駕都一樣危害道路使用者生命安全，點解政府對毒駕網開一面？

仲有，大家千祈唔好以為立咗法就一天都光晒。事關香港嘅交通安全法例好多都形同虛設，司法當局不嬲對危險駕駛導致他人死亡罪都高高舉起，輕輕放低。好似去年年初落馬洲嗰單大車禍，司機醉駕撞死六個人，卒之只判入獄六年，一條人命先至判一年咁大把。咁樣搞法，邊有阻嚇力呀！叮！

一句到尾，吸毒唔單止危害健康，仲會令人傾家蕩產，確實不可一，不可再，吸毒後揸車更係害人害己，立法打擊刻不容緩。如果班高官仲係玩玩吓，到時整鑊杰撻撻嘅，睇吓點收科！