運輸及房屋局副局長邱誠武曾經因為唔覆的士司機「大佬」電話，釀成的士堵塞交通風波，兩年後，佢似乎冇吸取慘痛教訓。
事緣上星期六，菜園村村民本來要求邱副落村開街坊會議，向村民講解申領復耕牌嘅審批標準，劉皇發尋日朝早十點鐘打電話搵邱副，邱副終於應承開三方會議，約好晏晝兩點半喺元朗高鐵資源中心見。
但代表村民同政府斡旋嘅菜園村支援組成員葉寶琳話喺下午一點四十分，邱副喺致電要求佢確認菜園村七戶有機會獲復耕牌嘅家庭全部出席會議，否則會議告吹，仲叫葉十五分鐘後打電話覆佢，但葉其後一直打唔通邱副嘅電話，成班村民由兩點半等到三點半，直到發叔出現，先知邱副因見七戶未齊人，所以唔嚟，班村民都好激氣。
我哋喺下午六點幾透過運房局新聞官搵邱副求證葉寶琳嘅說話，直到晚上十時邱副覆電話解釋，出席會議本來係想見嗰七戶家庭，但據佢所知，七戶家庭唔會現身，所以就唔出席嘞，仲話中午同葉寶琳傾完電話後，再冇收過葉嘅電話。到底邊個講假話？
葉寶琳話唔明邱副點解咁鍾意「甩底」，佢擺咁大嘅官威，係咪想留難村民？