立法會經濟事務委員會尋日突然要表決，決定係咪接受油公司代表要求，將個會閉門舉行，議員嘥咗成半個鐘討論表決嘅問題，仲有議員覺得油公司「大牌」，抗議離場，氣氛一度相當尷尬。
委員會尋日討論油公司應唔應該引入較低辛烷值汽油，根據立法會網站嘅開會通告，冇預告有油公司代表列席。殊不知一開會，主席林健鋒就話油公司代表可以列席，但擔心討論期間涉及價錢問題，要求閉門會議。聽到咁騎呢嘅要求，「大舊」陳偉業好激動：「冇理由油公司一句說話，唔公開就唔公開，好似要脅立法會！」佢又質疑講汽油辛烷值，好難同價格掛鈎，為表不滿，更抗議離場。
最後四票贊成、兩票反對、兩票棄權，閉門會議開得成。林健鋒話，就油公司要求閉門開會一事，秘書處試過致電問委員，又冇乜人回覆，惟有焗住喺會上處理。