咪話香港人情味紙咁薄，尋日中策集團主席馬時亨就過咗難忘嘅一日，因為佢收咗一份重磅禮物—一個重達十四、五磅嘅西瓜。個新疆有核紅肉西瓜係上環「中國龍」雜貨舖老闆娘黃太親自孭嚟送畀肥亨，多謝佢早前幫襯買煨番薯時畀本報發現，消息見報後中國龍生意暴增三倍！肥亨謙稱，全靠《東方日報》嘅威力，唔關佢事㗎！
話說黃太親自登門送西瓜時，肥亨唔喺寫字樓，佢收到秘書告知嘅電話時，覺得好愕然、好感動。原本佢想等中策集團副主席柯清輝一齊享用，但柯生忙於做空中飛人，所以尋日就喺灣仔華潤大廈中策嘅寫字樓舉行劏瓜儀式，請成班同事享用消暑。
呢個新疆西瓜清甜多汁，仲起晒沙，絕對係瓜中極品。梗係啦！中國龍標榜「專為嘴刁食家服務」，梗係唔靚唔賣！肥亨一邊歎西瓜一邊感嘆話，呢個西瓜有一種味道係任何西瓜都冇嘅，就係人情味嘞！