打上電台博洗底

邱騰華尋日竟然主動打上電台節目回應，話喺過去三年，環境局至少搞過六次大型記者會，Stand-Up（簡報會）就舉行咗五十二次，而佢自己上電台節目解釋政策都上咗七十二次喎，仲大讚自己喺問責團隊中，算係主動與傳媒接觸嘅一個。邱騰華又解釋，開閉門「吹風會」嘅目的，係想向記者解釋多啲有關政策的背景資料，唔係要逃避啲乜嘢。

咪以為咁就可以洗脫罪名，點知做電台節目客席主持嘅前高官王永平，一聽到都忍唔住話呢個數唔算多，邱騰華真係攞嚟衰！

係人都知，Stand-Up嘅形式係個官企喺度講完就走，記者往往未問問題，個官已急急腳走唔切。邱騰華企圖以佢Stand-Up嘅數目辯護，似乎係令自己露底多啲喎。話口未完，呢頭邱騰華畀人插，運房局局長鄭汝樺尋日又照辦煮碗舉行「吹風會」，認真好學唔學嘞！