後生仔本來就鍾意玩,「八十後反特權青年」亦都唔例外,不過,世事嘅嘢好神奇,明明諗住去玩,結果又同政治搞埋一堆!
尋日烈日當空,喺街撞到周澄嘅前度男友林輝,佢話一大班「八十後反特權青年」見早輪搞社運示威都辛苦喇,就約埋聽日齊齊去大浪西灣游吓水、同陽光玩遊戲,有成十幾人去㗎。點知,無啦啦大浪西灣又搞出「斬樹風波」,一班人經過商議之後,決定為保育出一分力,一於「寓娛樂於政治」!
林輝話,示威完就會跳落水,暢泳一番,然後曬吓太陽,既可消遣,又搞社運啦!千祈唔好話依家班後生仔無厘頭,其實佢哋有一心二用、一舉兩得嘅本領,仲好精打細算添!