政府舊年開始對超市、便利店等徵收膠袋費，每用一個收五毫子，防止市民濫用膠袋。政策實施整整一年，都係時候派成績單嘞。

首三季只收咗二千萬元膠袋費，係政府原先估計嘅十分一，即係話，膠袋使用量比估計少咗九成。嘩！直情係豐功偉績啦，唔怪之得環境局局長邱騰華笑到四萬咁口，環保署仲係威係勢咁開會慶祝添。

點知有環保團體不識好歹，居然跳出嚟玩踢爆。佢哋話，超市免徵費保鮮袋有被濫用嘅趨勢。即係點呀？即係媽咪雖然冇用五毫子買膠袋，但佢喺呢個貨架揀咗幾個橙，順手掹個保鮮袋裝起嚟，去嗰個貨架買咗一斤排骨，又掹個保鮮袋嚟裝，加加埋埋，入一次超市就用咗好多個保鮮袋。

正所謂小數怕長計，環保團體喺各區超市監察膠袋使用情形，雖然膠袋的而且確用少咗，但係保鮮袋使用量就急升，有啲超市每粒鐘用咗四百幾個，比徵收膠袋費前增加一倍幾。

更弊嘅係，連環保購物袋都濫用，有調查發現，好多家庭都有十個以上不織布袋，最多嘅有二十幾個，有啲家庭多到冇地方擺，就用嚟裝垃圾。學環保人士話齋，不織布袋用嘅塑膠係普通購物膠袋嘅十倍，仲含有好多雜質，唔容易回收，咁樣「始亂終棄」，更加唔環保。哈，環保袋最終淪為不環保袋，認真搞笑！

此情此景，令太一叮諗起一件往事，當年愛爾蘭實施膠袋徵費後，購物膠袋用少咗九成，但係垃圾袋使用量狂升十倍，政府被公眾炳到七彩。本港舊年開始實施徵費政策嘅時候，本報就提醒港府，要以愛爾蘭為戒，一定要周全考慮，唔可以顧此失彼。可惜班高官左耳入右耳出，卒之不幸言中，香港變咗第二個愛爾蘭，唔同嘅只係垃圾袋換咗保鮮袋咋。

政府實施膠袋徵費政策一年，購物膠袋用少咗，保鮮袋、不織布袋就用多咗，一出一入，加起嚟得個吉。政府大吹大擂嘅環保大計，原來只係一場騷。

叮！有咁嘅結果，其實一啲都唔奇，事關邱騰華等高官一開始就冇心搞環保，只係想做番場大龍鳳，證明自己有做嘢。唉，小小嘅膠袋徵費都搞到唔湯唔水，難為政府仲好意思吹水話要搞乜嘢環保產業。