立法會資訊科技界議員「IT豪」譚偉豪聽日喺立法會大會動議，要求政府透過網絡世界收集時下青年民情，佢尋日同傳媒總結政府嘅IT策略，一句講晒：Out爆！
IT豪話煲呔曾最應該開facebook，收集民情，但係煲呔曾早前為谷政改方案，喺facebook設「起錨」群組，就抵鬧到痹；政府將煲呔曾同高官落區嘅短片鋪天蓋地咁擺上網，但係拍攝手法生硬，一味叫高官講出撐政改理據，咁嘅手法hard sell到痹，毫無編排。
政府高層嘅IT Out爆實錄，仲有煲呔曾嘅「親兄弟」、財爺鬍鬚曾份，佢前日喺網誌登咗張同胡錦濤握手嘅相，IT豪質疑鬍鬚曾咁做，只會令人覺得同市民距離好遠。
所以，佢認為政府應該訂定一套IT政策，好似教點樣收集問題、用乜嘢標準同方式篩選問題作答、幾時回覆咁；仲有，高官要有胸襟，唔好吓吓黑面示人。