立法會民政事務委員會尋日用咗成個上晝去探訪屯門同元朗嘅女村長，諗住了解吓女性參與素來由男士主導嘅鄉郊事務，點知有份去嘅三名議員當中只得白鴿黨劉慧卿一位女士。公文袋嘅陳淑莊本來報咗名，點知原來佢同立法會秘書處之間有小誤會，所以最終冇去到。
佢哋先去陶淵明後人居住嘅屯門青磚圍拜會該村村長陶錫源，同埋屯門新村村長黃惠弟以及楊小坑村村長陳慧儀，之後又去元朗拜會該區十幾位婦女會成員。卿姐對於依家一千三百幾位村長中得二十幾個係女性甚為不滿，揚言將來要翻幾番；身為女士嘅民政事務總署副署長李美美都話當局會加強宣傳，希望出年一月村代表選舉多啲女士參與。