本文重點
經濟動力嘅立法會議員「蘇菲」梁劉柔芬兩年前成立「社區導者學會」，早前仲出咗本叫《選舉》嘅書講香港政治。尋日佢以學會召集人名義去咗間中學，同一眾中學生談功能界別。遇到學生質疑功能界別時，蘇菲就不斷反擊，跟住力陳功能界別嘅好處。嘩！佢咁做，擺到明係搭個台畀自己，為功能界別護航啫！
喺功能界別攞得四千幾票
白鴿黨嘅「肥仔明」李華明同建仔嘅李慧琼都有嚟撐蘇菲場。有個學生問蘇菲，功能界別嘅選民基礎咁薄弱，究竟知唔知實際選民有幾多？本身係紡織及製衣界別嘅蘇菲即刻面色一沉，話自己知道係得二十幾萬選民，但反指依家《選舉》呢本書係由佢呢位功能界別嘅議員所出，希望同學唔好淨係睇選民基礎呢樣嘢，要留意吓佢哋嘅工作同貢獻喎。
蘇菲叫班學生哥唔好睇選民基礎，要睇貢獻，但肥仔明喺活動上話，佢喺九龍東攞四萬八千票當選，蘇菲喺佢嘅界別攞四千幾票咋！嗱！肥仔明係立法會九龍東地區直選議員，佢咁講即係暗諷蘇菲選民基礎薄，拆人哋個台啫！正所謂事實勝於雄辯，班學生哥應該聽得明嘅。