白鴿黨喺過去一個月經歷最風雨飄搖嘅日子，但副主席「單雞」單仲偕就同家人飛咗去南非豪睇世界盃，惹起唔少黨友微言。前日佢終於返咗香港，但返嚟之後首個重要會議，都唔係同黨友開，而係尋日嘅西九管理局董事局會議，唔怪得之班黨友咁嬲佢啦！
單雞再三強調，佢早喺大半年前就買咗飛去南非睇波，後來政改問題峰迴路轉，個黨面臨嘅壓力愈嚟愈大，佢都曾經諗過自己提早返港，但由於南非治安真係好差，佢哋喺當地租架車都試過畀人爆玻璃偷嘢，令佢無法安心掉低太太同兩個仔。對於黨友投訴佢連電話都冇打過返嚟慰問吓，佢就話喺南非打長途電話返香港，每分鐘要成十幾蚊，相信黨友會理解佢喎。
佢喺黨內專責選舉工作，直言政改方案通過後，香港成個政局同選舉形勢唔同晒，白鴿黨喺明年區議會同後年立法會選舉嘅部署，全部都要傾過，嚟緊暑假佢會有排忙，算係對個黨做番啲補償。至於之前喺黨內報咗名參選立法會港島區嘅佢，會唔會因應新形勢改為參選嗰五個「超級」區議會議席呢？佢就話依家言之尚早喎。