科大校長陳繁昌係國際知名嘅數學專家，離港讀書同工作咗幾十年，原來佢唔單止計數叻，仲保留咗中國人尊師重道嘅美德。尋日問佢揼彤叔心口嘅過程，佢笑謂舊年九月返港接任科大校長後，就即刻登門拜訪彤叔，當時大家都幾好傾。今年過年佢又去同彤叔拜年，後來第三次再見彤叔時，先至提起大學要興建一幢全新科研與教學大樓，但仍然缺少資金，經過詳細解釋之後，彤叔就好疏爽咁應承捐贈九千萬元，終於令呢座需資五億元嘅大樓資金全部到位。

雖然酷暑難當，但彤叔做起善事上嚟渾身是勁。彤叔近年嘅波鞋Look深入民心，尋日見佢着住對七百蚊有找嘅黑色Nike Free經典跑步鞋襯西裝，形象好親民，佢話貪對鞋夠舒服，屋企有兩、三對波鞋替換，唔算多啦！

彤叔二仔鄭家成嘅囝囝Conroy（圓圖），舊年被安排返家族企業周大福集團任職後，行事風格好低調，尋日雖然同堂細佬、伯父鄭家純嘅大仔Adrian傍住爺爺公開露面，但面對傳媒時好拘謹。

科大呢幢即將興建嘅科研與教學大樓樓高八層，面積達一萬平方米，大樓將設有開放式實驗室同先進教學設施，仲有一個有四百個座位嘅多用途講堂，彤叔慷慨解囊，新大樓將以彤叔命名。陳校長好自豪咁話，質素可媲美牛津大學㗎！