本文重點
政改方案通過後，下屆特首選戰隨即掀開戰幔。唐唐嘅家臣、立法會五散人之一嘅林大輝，早前已先拔頭籌，高調成立社區組織「C18」，名為加強社區聯絡同工作，但被外界質疑實為鋪路，日後做唐唐嘅「選舉機器」。五散人另外三子都應承幫C18手做顧問，唯獨會計界嘅「波波」陳茂波一口拒絕大輝，跟住坊間即有風聲傳出，指另一疑似特首參選人、行會召集人CY梁振英正喺度埋緊班，而班底包括咗波波喎！
唔跟兄弟加入C18
傳言甚囂塵上，尋日見到波波，當然要捉住問清楚啦。佢話自己唔加入C18，純粹係因為自己忙喎！之不過，五散人有四個兄弟都入晒喎，佢竟然唔跟大隊，咁講真係信不信就由你嘞！
當問起有人認為佢係CY嘅G，佢表現得似乎幾抗拒，仲一再否認添！佢認為依家時間尚早，唔會評論呢兩位疑似特首候選人，總之就係要保持中立！
不過，當畀人問及CY嘅嘢時，波波就即刻封嘴唔答。佢坦言佢好多年前喺專業聯盟度認識CY，大家都係少數一開始就喺度嘅成員，所以大家確係有啲交情，但自己幾年前已經退下火線，冇再理聯盟嘅嘢喇。咦！擺明想同CY劃清界線喎！
老實講，政治波譎雲詭，依家形勢仲未明朗，真係挨邊一邊都死，波波咁講，好明顯係想洗底，話自己邊個都冇撐啫！
雖然波波同CY劃清界線，但係佢班兄弟反而要親近CY。資訊科技界議員「IT豪」譚偉豪尋日就自爆，嚟緊五子已經約咗CY食番餐飯聯誼吓。佢講笑咁話，CY唔會主動約佢哋，事關有大輝喺度喎。
有人笑稱大輝應該去收吓料至係，IT豪就笑而不答，不過就話外間成日認為五子眼中淨係識唐唐，所以佢哋點都要同CY見面平衡吓「洗吓底」，仲話希望可以同專業界嘅CY暢談吓對樓市同經濟政策嘅睇法。
嗱！呢啲搞平衡嘅小動作，咪又係想扮中立囉！