話說大埔松嶺村匡智會匡智之家有九名輕度智障學童，幾年前由教育局批准，經社會福利署轉介，去咗匡智會葵涌智障學校讀書，近日又忽然話要調返大埔校舍。可憐班智障少年，畀當局招之即來，揮之即去，玩到氹氹轉。難怪關注團體狂炳教育局同社署失職，將學生當波踢。叮！

教育局死撐，話咁安排可以令智障學童就近入學。又話以前要佢哋跨區返學，係因為大埔區冇輕度智障學童學位，依家新增咗學位，就可以安排佢哋返大埔。

照咁講，當局對智障學童都幾關心，一有學位就第一時間諗到佢哋，各位家長，仲唔講聲多謝！

可惜其實並唔係嗰回事。如果當局一早就堅持就近入學原則，班細路就唔使山長水遠去葵涌讀書，令家長日日牽腸掛肚啦。每日來回坐粒幾兩粒鐘車，你估好過癮呀，就算正常嘅細路都難頂。佢哋去葵涌咁多年，有邊個官員為佢哋着想過呀？

好嘞，家陣葵涌間智障學校逼爆，要退番啲學位畀本區學童。於是乎，當局「忽然就近入學」，將智障學童一腳踢返大埔。

如果真係就近入學，家長求之不得。可惜當局嘅「就近入學」只係敷衍了事。呢幾個學童喺葵涌分別入讀唔同年級，第日返到大埔，中一、中二、中三冚澎冷喺同一間課室上課，點保證教學質素呀？教育局話喎，跨級分組教學係特殊學校一貫採用嘅教學模式，保證唔會有問題。呃鬼食豆腐咩，分明係唔夠教師，夾硬將啲學生炒埋一碟，卒之一定顧此失彼。一句講晒，當局將智障學童趕返大埔，係想甩包袱，所謂就近入學只係藉口嚟咋。

講開又講，本港殘疾人士受教育嘅權利從來就冇保障，呢次人球事件只不過係冰山一角。呢，專為視障學童而設嘅心光學校近年就因收生不足，持續被當局縮班，舊年九班變八班，下學年八班變七班，資助成百萬咁削減，激到校方同家長生蝦咁跳。

心光學校擁有百幾年歷史，喺港英時期就響噹噹，回歸之後反而惡運連連，特區政府唔知搞邊科，叮！

各位高官，唔該畀少少同情心啦。試想吓，人哋個細路有生理缺陷，已經夠閉翳嘞，你哋仲將細路當波踢，簡直喺家長嘅傷口上灑鹽。將心比心，如果殘障學童係你哋嘅仔女，你哋會唔會咁做呀？