政改方案通過後嘅政治局勢秒秒在變，建制派第一大黨建仔首向白鴿黨招手，話大家各方面都可以多多合作，雖然最後冇一隻白鴿騷佢，但已經落人口實，畀社民連狂轟白鴿黨唔配做泛民，可以索性唔去七一遊行，改去建制派搞嘅七一巡遊，擺明要將分裂升級，變成非友即敵！
身兼七一巡遊搞手嘅工聯會會長「棠哥」鄭耀棠，尋日被問及係咪會邀請埋白鴿黨去巡遊時，雖然冇正面回應，但就笑笑口咁話：「歡迎任何一個人參加！」仲指七一係開心日子，邊個想嚟都絕對唔會篩選咁話！言下之意，即係隨時歡迎白鴿黨歸邊啫！
喺政改表決前，白鴿黨副主席劉慧卿行過去棠哥嘅支持政改陣營，已經畀各界狂轟攞景兼贈興，白鴿黨應該心知肚明，建制派依家係個大火頭，掂吓都燒傷手，如果唔同佢哋劃清界線，分分鐘火燒後欄，鴿焦巢覆！
再加上棠哥嘅巡遊早已被標籤同七一遊行對着幹，如果白鴿黨唔小心行近一步，白鴿即變燒乳鴿。棠哥嘅善意之手，睇嚟似死亡之吻多啲！