長實集團主席「超人」李嘉誠尋日現身汕頭大學，為汕大圖書館展示裝置藝術品「聆聽大地的聲音」主持開幕儀式，提醒大家關注物種滅絕同埋棲息地減少嘅危機。超人親自出動撐環保，身為呢個活動推動者嘅著名華裔建築師Maya林瓔就最開心嘞！
Maya話「聆聽大地的聲音」第一次喺中國展出，汕大係首站，跟住會由南向北喺內地八個城市巡迴展覽，歷時六個月，下年就會展開第二階段展覽，深入內地東北同埋中西部等城市。咁大陣仗嘅活動，少啲財力、人力都唔掂，所以佢好感激李嘉誠基金會嘅支持，將呢個裝置藝術帶到中國。汕大師生將跟隨巡展四圍去，期間又會同環保團體見面，同公眾分享關注環境嘅議題。
Maya嘅設計才華早喺就讀美國耶魯大學時已嶄露頭角，而中國近代知名才女兼建築師林徽音係佢姑媽，呢段出身令華人對Maya倍感親切。