白鴿黨轉軚支持政改方案，預期喺聽日民陣做搞手嘅七一遊行會遇到激進派嘅狙擊，仲表明企硬一定會參加遊行。尋日喺社交網站facebook發現民陣廣邀各界參加遊行，但白鴿黨議員「高達」李永達、民協議員KK馮檢基竟然揀咗「拒絕出席」，唔通佢哋真係打算同民陣一刀兩斷？
非也，原來只係誤會一場。高達同KK不約而同咁話，所用嘅facebook帳戶會有職員管理雜務，佢哋只會親自回覆網民留言同意見，而為咗令管理比較有效率，佢哋都吩咐職員全部拒絕facebook內所有邀請佢哋嘅群組同活動，結果就搞出呢個小風波。
事後高達即刻喺facebook澄清，話聽日佢一定會行足全程，而KK就話網上世界疑幻似真，唔會特別去更正，認識佢為人嘅，自然會知道聽日一定喺維園見到佢，唔會將呢啲小事放喺心。