尋日浸大當代中國研究所所長薛鳳旋舉行「香港發展地圖集第二版」新書發布會，活動上見到浸大校董會主席Wilfred王英偉，佢都好鍾意睇波，仲沾沾自喜咁話出差北京時扭開中央電視台免費睇世界盃，過足球癮，可惜返到屋企因為冇「有線」，所以冇得睇。

呢個中港差異令Wilfred有感而發，話球迷要畀錢先有波睇，當然唔過癮，但互聯網世界發達，有人用其他途徑睇，想阻止都好難。佢公子梓雋就發現可以喺網站即時收睇到賽事轉播，兩仔爺睇到唔捨得瞓。

講番薛教授出書，行政會議成員劉皇發同製衣界元老陳瑞球都嚟恭賀，原來兩位係佢嘅大恩人。薛教授話喺八十年代時冇錢做地理研究，多得發叔捐出五十萬元做研究基金；至於球伯就贊助今次新書出版，捐出逾百萬元。呢兩份暖意令薛教授好感慨，批評政府只顧增加就業，對學者缺乏資助，唔係有心人出手，本書根本出唔成。