由身兼廠商會立法會議員同沙田區議員嘅林大輝牽頭、醞釀逾年嘅地區組織C18（社區18），尋日正式成立，仲特別揀咗林大輝中學做典禮地點，借勢晒吓佢間直資中學，無論政界定工商界嘅各路英雄都有嚟撐場。
雖然大輝話想藉C18團結區議員嘅力量，搞多啲地區事務，但唔少人都覺得C18只係一個為佢前老闆唐唐競選下屆特首嘅選舉機器，受益人唐唐就有意無意避走四川冇嚟到，但佢爸媽就送咗個花籃嚟。人唔到禮到，C18係咪真係一個社區組織咁簡單？
大輝亦承認同唐唐嘅「關係」，話好明白大家會有咁嘅諗法，但強調C18唔係任何政黨政團，主力關注民生議題，甚少講政治，所以將兩件事咁掛鈎唔多啱。佢又話如果為咗一個人去成立組織，係冇可能，亦都唔長久喎。
除政商界名人嚟撐場外，仲有另一班人嚟踩場贈興。話說有班建築工人喺典禮前嚟到林大輝中學門外示威，抗議大輝欠薪。據聞大輝事前已經答應同佢哋喺下個月坐低慢慢傾，叫佢哋唔好嚟踩場，之但係班工人覺得大輝反咗口幾次，唔再信佢，堅持嚟抗議。大輝對此好無奈，話影響到學校同學生，覺得「好痛心」，仲話自己尊重法治，承諾一定會處理好件事。