話時話，今屆立法會先後發生過三次肢體衝突。舊年六月中，一名持刀男子帶埋遺書喺公眾席突然自殘，連插自己七刀，即場血灑立法會。之後到舊年十月，煲呔曾出席立法會嘅答問大會，社民連立法會議員「長毛」梁國雄因為違反議事規則，畀立會主席掃出門外，佢同保安員糾纏期間累及一名保安員嘅腰、韌帶同手都傷晒，要抖成五日至返到工。

最近一次就係上個禮拜辯論政改方案第二日，八十後反特權青年成員陳景輝喺散會前突然大叫口號，有保安員抬佢走嘅時候又撞傷條腰，搞到要休息三日，好彩尋日佢已經如常返工，算係冇乜大礙。

談判技巧都要學埋

眼見無論啲議員同旁聽嘅市民都失晒控咁，本身係精神科醫生嘅潘佩璆慨嘆此風不可長，仲好勞氣咁大鬧示威者：「人哋係冇阿媽生嘅咩？」於是乎去信要求討論保安事宜。佢仲幫立法會秘書處諗定解決方法，就係運用佢嘅精神科專業知識，建議眾保安員要學一套精神科之中用嚟應付暴力傾向人士嘅方法，包括將衝突消滅於萌芽，唔得就要有適當自衞，終極就係以團隊合作制服暴力傾向人士。

潘佩璆仲話談判技巧都可以學埋，隨時派上用場，總之就要加強系統性訓練同埋定期演習，務求有事嘅時候確保保安員唔會整親。

本來係件好事嚟，但諗真啲，連立法會內都要出動到對付暴力傾向人士嘅方法，咁立法會咪變咗精神病院囉！咁你話係好笑定可悲呢？