話說為咗紀念明年辛亥革命一百周年，孫中山孫女孫穗芳出錢出力，計劃喺香港竪立多尊孫中山銅像。舊年十二月，中大校長劉遵義主動聯絡孫穗芳，希望其中一尊銅像落戶中大，仲誓神劈願話可以喺今年二月竪立。殊不知，銅像早於一月運抵，但劉遵義左推右推，一時話選址及安全問題仍待討論，一時又話自己離任在即，要交畀下一任校長處理喎。一拖再拖，雖然候任校長沈祖堯表示上任後會即刻跟進事件，但究竟孫中山銅像幾時先至可以見到天日，依然未有定論。

叮佢個鎯鎯！銅像早於一月運抵中大，大拿拿五個月時間，如果校方有心竪立銅像，點可能拖到今時今日吖。劉遵義用即將離任作為拖延理由，簡直九唔搭八。唉，民主女神有人呵，中山銅像冇碇企，難怪孫穗芳氣從中來，怒斥中大嘅做法對孫中山好唔尊重，並質疑民主女神遲嚟先上岸，「是不是我不夠兇」？

想當年，孫中山先生帶領中國人推翻幾千年封建帝制，建立民主共和，被尊為革命先行者，偏偏喺香港，呢位革命先行者卻備受冷待，實在令人唏噓。記得孫中山早年喺香港讀書、搞革命，佢講過：「我之革命思想，完全得之於香港。」今時今日，中文大學竟將孫中山銅像打入冷宮，豈止不敬，簡直與中華民族為敵，與炎黃子孫為敵！

話時話，上次中大拒收民主女神像，泛民喊打喊殺，嘈到拆天，今次中大冷待孫中山銅像，佢哋反而粒聲唔出，真係咄咄怪事。難為佢哋口口聲聲爭取民主，其實早喺一百年前，孫中山已提出民族、民權、民生嘅三民主義，為中國度身訂造民主政治，連外國人都讚口不絕。泛民人士厚女神而薄中山，證明佢哋根本係井底之蛙，對民主一無所知。講開又講，三民主義有三個「民」，民主女神只有一個「民」，邊個先至係真民主，唔使問喇啩。

孫中山先生講過，一個國家要求發展，最重要係民族主義，先要將國民團結起嚟，國家先至可能富強。但喺香港，唔少人眼中只有西方國家，無視中華民族，所以對於西方舶來嘅民主女神，佢哋呵護備至，對於中國人尊崇嘅孫中山，佢哋反而棄如敝屣，香港唔亂至奇！

一言以蔽之，香港要發展，先要消除漢奸洋奴，建立國家民族觀念，正如孫中山話齋，驅除韃虜，恢復中華！