小白觀點:成日放飛劍唔通壞肺?

四年一度世界盃開鑼，今屆又畀收費台包咗嚟做，免費台冇得播，小白老弟對足球真係冇乜興趣，所以影響唔大，因為我成日覺得足球並唔係一種健康嘅運動。何出此言？你睇吓嗰啲足球員吖，唔知點解口水痰特別多，成日喺綠茵場上放飛劍，你有冇見過籃球員喺球場吐痰，跣到對手一仆一碌吖？冇吖嘛，所以我懷疑踢得波多，好可能會壞肺都唔定。

家陣畀收費台玩晒，搞到好多人一係畀錢裝，一係就去酒吧飲兩杯。其實呢啲關乎全港球迷利益嘅議題，因乜事嗰班「80後」唔出嚟苦行抗爭呢？陳巧文為乜事唔圍立會，要求政府撥幾億買播映權呢？煲呔曾為挽低殘民望，為乜唔強勢出九招十二式規管足球轉播呢？仲有，呢個咁好嘅時機，點解政黨唔乘機抽水，推出凡參加撐政改遊行，只要畀四十蚊就可以睇晒所有賽事呢？

Blog:http://sunsiupak.blogspot.com

阿豪觀點:冇得捧自己國家真洩氣

四年一度嘅世界盃開鑼，各位球迷又要捱更抵夜追波睇……不過冇緊要啦，你老細同你老細個老細，分分鐘都係球迷，或者都會忍你烏眉瞌睡一個月嘅！

好彩豪伯唔係標準球迷，否則呢個月嘅心情肯定好複雜。你諗吓吖，要全情投入世界盃，梗係有得捧番自己國家至夠過癮嘛！大家睇吓東道主南非，就算幾乎人踩人都好，仍堅持要出嚟捧國家隊場。你睇吓我哋香港人吖，莫講話港隊參賽係遙不可及嘅夢想，就算想國家隊爭氣啲都唔係咁易，睇世界盃而成日要撐其他國家隊，感覺始終有啲彆扭。正如有人曾經比喻，中國人自己冇得選舉，但睇人哋英、美等國家大選又鬼咁肉緊，就好似公公喺度評論小電影演員嘅技術。咦，咁同自己國家冇得踢世界盃，照樣喺度指手畫腳，好似冇乜分別喎，一諗到呢點，對世界盃嘅熱情當堂熄晒！

Blog:http://lukchiho.blogspot.com

網友觀點

足球小將：啲政黨能夠幫市民爭取到免費睇波，肯定贏盡掌聲！

煩 死 人：特首同班議員傾吓波經好過啦，成日為政改嘈嘈閉！

低級職員：老細係球迷要醒定啲，唔夠瞓脾氣零舍暴躁，鬧人都勁啲！

小巴常客：最怕啲司機大佬搞到烏眉瞌睡，真係要驚足成個月㗎！