海洋公園主席兼有蘭桂坊之父稱號嘅盛智文，喺中、港同泰國都有生意，仲係永利澳門有限公司副主席兼非執行董事。前日下晝，佢以地膽姿態陪永利主席兼行政總裁史提芬永利（Stephen A.Wynn）同佢女友行街街兼Shopping。
前日下晝五點接近放工時間，太子大廈門外有個熟口熟面嘅人講電話，睇真啲竟然係扮嘢文，佢身邊仲有個戴太陽眼鏡、食雪茄嘅外籍成熟男士，佢就係永利老闆Stephen A.Wynn，Stephen隔籬仲有個年輕苗條嘅女郎，永利澳門執行董事兼營運總監陳志玲（Linda）亦有隨行。佢哋一行人橫過遮打道後穿越行人隧道，再經過怡和大廈行人天橋行去天星碼頭，邊行邊傾，之後又喺中環天星碼頭登船。
一路上，Stephen同嗰位外籍女郎好似糖黐豆咁，時而攬住女友嘅纖腰，行上渡輪時又好細心咁蹺住女友嘅手，簡直就係一對熱戀中嘅男女，扮嘢文一路表現得好自然，唔怕做電燈膽。佢尋日解釋，當日啱啱喺中環同Stephen開完工作會議，跟住陪佢過尖沙咀購物，夜晚去蘭桂坊佢開嗰間Tokio Joe歎日本菜，尋日四點幾至返澳門。扮嘢文仲爆料，Stephen經常來港開會、見客、購物、去蘭桂坊幫襯，好嚮往香港嘅人同事。