「光纖之父」高錕再添殊榮，繼攞完諾貝爾物理學獎後，白金漢宮尋日宣布英女王壽辰授勳名單，高錕獲英女王授予KBE爵級司令勳章，榮升高爵士。今年另一個KBE得主係阿聯酋航空執行副主席費拿根。同上次攞諾貝爾獎一樣，高錕夫婦又係夜麻麻知道呢個消息，唔通真係午夜喜訊特別多？
高錕同英國好有淵源，佢喺香港讀完中學後，就去咗英國升學，喺嗰度開始研究光纖技術，奠定日後嘅科研成果。高錕仲喺英國邂逅太太黃美芸，兩人情投意合，喺英國度過好多美好時光。
93年已獲CBE
高錕早喺九三年，就已經獲頒CBE司令勳章，今次封爵，仲可以順道返英國緬懷一番，唯一唔同嘅係，高錕已經由無名小卒，變成影響全世界嘅科學家。