尋日沙田馬場舉行一年一度嘅「港大校友會盃」賽事，賽前聚餐有唔少名人同舊生畀面撐場，好似賭王何鴻燊四太梁安琪帶埋愛女超盈同超欣出席，仲有名人趙世曾、華懋慈善基金主席龔仁心夫婦等，當然唔少得港大校長徐立之同身為港大校友嘅馬會主席陳祖澤（John）啦！
對於係咪捐錢畀港大，龔仁心話：「睇吓有冇緣啦！」咁即係點？佢話要等單官司完咗先至可以捐到錢喎。趙世曾就話：「請食飯通常都係想捐錢啫！睇吓有乜幫手囉！」不過，最豪氣都係四太，話賭王以前已捐過好多錢畀港大，有需要可以再捐喎！四太之所以咁捧場，除咗賭王係港大校友外，原來愛女超盈目前就讀港大一年級，主修工商管理學系。
講番尋日港大個「港大校友會盃」活動，校友會邀請埋服務大學堂超過四十年、宿生稱為「三嫂」嘅袁蘇妹出席，全部舊生企喺主禮台上，唯獨退咗休嘅三嫂有櫈坐，證明地位舉足輕重。