押後表決盞添爭拗

表決日愈嚟愈接近，各方勢力都鬥拋底線，基本法委員會副主任梁愛詩日前出席個活動時，就拋出「應考慮押後表決」嘅建議，佢話如果各方有望可以喺短時間內達成共識，可以稍為押後一段短時間表決，等大家有多啲時間討論。政圈中人認為押後表決可以視為特區政府同中央釋出嘅善意，據了解，建制派內部對係咪押後表決政改日期存在兩種唔同意見，北京方面仍未最後拍板，相信呢個禮拜情況會明朗。

不過，金刀梁就認為，社會已經討論方案多時，再押後只會增加爭拗，未必有好處。佢嘅立場同我哋早前披露政府嘅想法好接近，即可能被人喺七一呢個敏感日子做文章，谷高遊行人數，甚至影響下月中提交立法會嘅最低工資條例草案等。金刀梁仲話，香港已經錯過咗○五年嗰次，如果今次再拋錨，香港人有幾多個十年呢？呢句說話曾經打動好多香港人，唔知今次有冇效呢？