13/06/2010

播放本新聞相關短片

政情:張建宗講起錨氹細路

呢輪全體問責班子都變身水手,人人掛住嗌起錨,勞工及福利局局長張建宗尋日出席一個有關兒童發展嘅活動時,唔單止戴上「起錨」襟章,仲特登喺講詞中,夾硬推銷政改,話兒童係未來嘅選民,有機會投票選行政長官,呼籲本港嘅政制唔好再原地踏步。細路明唔明?似乎一頭霧水多啲。

張建宗尋日嘅講詞係有關政府推行嘅兒童計劃,活動由勞福局主辦,張建宗致詞時,梗係要配合場合,大講兒童發展基金啦,但佢講講吓,竟然忽然轉軌,話政改方案同青少年息息相關。佢話香港嘅政制發展已去到關鍵時刻,希望大家支持二○一二政改方案,等香港政制唔好再原地踏步。

佢推銷得好認真,在座人士嘅反應就似乎麻麻。問責團隊已經先後落區三次,我哋問佢幾時會再落區宣傳,張建宗似乎冇標準答案,只好隱隱晦晦咁話會配合團隊安排。