許曉暉尋日以署理民政事務局局長身份出席「睇波不賭波 健康齊踢波」活動，一班立法會議員踢波做宣傳，活動嘅合辦機構有民政事務局、博彩及獎券事務委員會同平和基金等，場內仲有包括四個戒賭中心在內嘅機構擺遊戲攤位。許曉暉先喺活動揭幕禮上致詞，講咗一篇反賭波嘅講稿，稍後新聞界問到具體反賭波工作時，佢卻當堂出醜。

我哋當時問佢政府同合作團體有啲乜嘢計劃，只見許曉暉聽完問題就呆咗，O嘴兩秒後，連合作團體個名都噏唔出，要新聞秘書喺佢身後發功，結果企得近嘅傳媒都聽到秘書提佢：「講平和基金啦……」提水之後，許曉暉至手忙腳亂「接波」，可惜已經太遲喇！不經不覺，佢已經上任近兩年，臨場表現卻未見進步，到底係呢輪掛住起錨、未進入反賭波嘅角色，定係署任局長壓力太大呢？

泛民建制派齊講波經

世界盃首日，官員出醜，議員就有唔少歡樂，近日因為政改立場各異嘅泛民同建制派議員仲一齊講波經添！大輝話佢睇好西班牙，覺得佢哋隊波夠晒全面，但奪冠嘅隊伍應該係巴西，仲話最想見到巴西同西班牙對壘。白鴿黨李華明話佢都最想睇呢場，但佢就捧英格蘭奪冠。IT豪同大輝一樣熱捧西班牙，黃成智就係巴西粉絲，大讚佢哋扭波踢波頂呱呱，不過為免第二日唔精神，所以謝絕凌晨兩點半開場嘅賽事。