聽曾浩輝咁講，病毒冇變種，成人感染比例又唔高，高峰期亦唔係十分可怕，咁豈不是一天都光晒，冇驚冇險過終點？

計太一叮話齋，政府靠得住，豬乸會上樹。如果你以為高官咁滋油淡定，就表示天下太平，咁你就太傻太天真啦。腸病毒有冇變種，你唔知，好多人亦唔知，太一叮只知道，由腸病毒引起嘅手足口病個案，今年三月後開始大幅上升，至今已有三百六十九宗感染個案，打破過去十年嘅紀錄，當中近七成發生喺幼兒中心及幼稚園。

更可怕嘅係，內地、台灣、新加坡亦紛紛被腸病毒攻陷，香港簡直係四面楚歌，風聲鶴唳。其中內地嘅疫情最嚴重，到上個月初，已經有四十二萬人中招，其中重病個案超過五千單，二百六十人死亡。

疫情當前，內憂外患，點知食衞局局長周一嶽等衞生官員仲拾吓拾吓，居然當內地衞生部門嘅疫情通報冇到，直到有公立醫院護士染病死咗，佢哋先至識驚，急急腳命令爆發疫情嘅學校同幼稚園停課。

講開又講，港府反應遲鈍，後知後覺，做任何事情都慢人幾拍。呢，日本宮崎縣牛場四月初爆發口蹄症，幾百隻牛被人道毀滅。中國衞生部門第一時間禁止日本奶粉、牛肉、牛奶等食品入口，嚴防疫情傳入。睇番香港，港府好似老僧入定咁，完全冇動作，日本奶粉照賣，日本牛肉照食，若無其事咁。

當然，香港同內地情形唔同，使唔使一刀切禁止日本牛類製品入口，值得商榷，但咁噃，市民有權知道到底發生咗乜嘢事，當局就算唔禁止日本牛類製品入口，最低限度都要向市民通報日本疫情，提醒大家提高警覺。呢，就係因為當局乜都唔做，搞到有市民自己去問供應商，究竟日本奶粉有冇問題。叮，港府連內地衞生部門都不如，你話係咪靠害吖。

所以話，千祈唔好聽港府官員發噏風，以為腸病毒只係小兒科，冇乜大不了。人命關天，大家絕對唔可以大意，否則萬一不幸中咗招，咁就冤哉枉也。小心駛得萬年船，自求多福啦。叮你個鎯鎯！