小白觀點：「食玩署」應做嘢益市民

成日有人話依家百物騰貴，查實邊度係吖，通街都有平嘢食，幾十蚊都可以食到海鮮餐你又知唔知吖？嗱，近排好多政黨推出特平海鮮餐，菜式一啲都唔輸蝕㗎，有白灼蝦啦、蒸魚啦，對海鮮敏感咩，唔緊要，成隻貴妃雞你嘅，埋單位位掟低兩張廿蚊紙就走得，日日有遊行都唔拘喎。

計我話，班高官好應該偷師啦，反正食環署做極都唔掂，索性搣甩「環境衞生」呢Part，借勢改名做「食玩署」，高價請米芝蓮名行政大廚取代卓永興做署長，日日大開流水席，任食唔嬲。咁都不特止，仲要請班口靚模做知客，個個心口開一大個窿。嘩，咁好風景，弊在冇相機添，點算？唔緊要，新聞處大把器材，頂級數碼相機兼大光圈長鏡乜都齊。有得玩有得食，個個肚滿腸肥筋疲力竭，政改？話之特首駕崩改朝換代啦！

e-mail：sunsiupak@gmail.com

Blog：http://sunsiupak.blogspot.com

阿豪觀點：遊客上街感受香港特色

成日話依家物價貴，其實只要識碇，通街都有平嘢食，好似話幾十蚊都可以食到海鮮餐喎，係真唔係呀？當然係真啦，只要大家好似某團體咁講，肯「夾錢食飯」，之後又做少少帶氧運動，喺條街度行吓，咁就可以大快朵頤㗎喇，反正都係「順便」行吓街啫，何樂而不為？

唔講唔知喎，原來平價海鮮餐呢家嘢，並唔係某團體嘅專利，佢哋嘅對家一樣有，不過就貴十蚊。你話「消費者」幾幸福吖，平嘢都有得揀到啱晒自己心水先至參加，睇嚟香港都唔使為咗立條《公平競爭法》而拗餐懵啦！

哈，話時話，香港被喻為「遊行之都」，肯定有大把呢類「豪食團」啦。旅行團與其強迫團友購物，倒不如安排遊客參加呢類咁有香港特色嘅活動啦！反正煲呔曾場拋錨爛騷，都係派傳單畀啲連廣東話都唔識嘅老外啫……

e-mail：lukchiho75@hotmail.com

Blog：http://lukchiho.blogspot.com

網友觀點……

窮　鬼：：滿晒額未呢？我都想去擦番餐呀……

街　坊：反對派唔好執輸呀！搞個鮑魚餐搶番啲客至得喇！

匿　名：我都想食呀><

清潔阿嬸：嗰啲政黨應該多啲搞，益吓我哋低下階層，我哋好少機會食海鮮㗎。

有料爆：

免費電視冇得播世盃，不如播番上屆啦。

SMS傾埋一份：6016 2496