愈嚟愈多政界人士睇淡政改方案獲通過嘅機會。經濟動力嘅林健鋒、梁君彥同梁劉柔芬，尋日中午連同工商專業政改動力副召集人、資深大律師胡漢清召開記者會，開宗明義撐政改，宣布將以郵寄通函形式，向全港住戶同工商企業寄發撐政改宣傳單張，呼籲市民透過電郵、書信或電話，叫泛民議員向方案投贊成票。
經濟動力唔止以民意壓民主派，仲搞噱頭寸泛民，單張一邊印有「起錨」標誌，另一邊則用被網民惡搞嘅「超錯」圖樣，揶揄泛民若再次否決方案，就係「超錯」嘞！
咁預留幾多彈藥撐政改先？林健鋒只係話郵政署嘅郵寄通函收費透明，每封信郵費幾毫子，有數得計，寄信用咗大約一百萬元，下禮拜政改動力亦會喺幾份報紙登撐政改廣告，費用由工商界捐助。佢講笑咁話，總之一定比唔上泛民策動五區補選而浪費咗嘅嗰一億五千萬元公帑啦！
另一邊廂，專業會議亦搶住出嚟撐，梁美芬、何鍾泰同劉秀成亦喺三粒鐘後召開記者會，呼籲泛民回心轉意對方案投支持票。為免泛民「溝通派」被拉向激進一端、鐵了心反對方案，專業會議倡議舉行圓桌會議，建制派同泛民閂埋門協商一套共同接受嘅方案出嚟，但佢哋承認日子倉卒，難度極高，強調無論方案過唔過到，機制都應該繼續運作，為二○一七同二○二○年兩個普選辦法清除障礙。