話說立法會福利事務委員會喺上個禮拜召開公聽會，聽吓公眾人士對香港福利長遠規劃嘅意見，點知成個會官方代表只係得社諮會成員，勞福局只係派咗一個助理秘書長出席，事後張建宗畀人封咗做「社福逃犯」，除多個團體表示不滿外，委員會亦好㷫，跟手去信對「社福逃犯」表示遺憾。

張建宗可能驚被追殺，前日寫咗封長達三頁紙、洋洋幾千字嘅信畀委員會「沙冧」補鑊，話成件事係有啲誤會，仲話為咗下次再舉行嘅諮詢會唔好畀人有話柄，局方同社諮會會商討吓與會嘅名單。

稱尊重社諮會獨立性

信中又將社諮會嘅成立、職能、諮詢過程，以及諮詢後會分析資料同意見，再做份報告畀政府考慮等仔細咁介紹一次。佢仲話為咗社諮會可以獨立客觀去做研究，所以當局要尊重佢哋嘅諮詢安排，冇安排官員出席，唔好等人覺得局方介入同埋左右社諮會咁話，所以佢哋係冇逃避責任。咁擺明係想洗底啦，但係咪洗到底都要睇吓委員會收唔收貨至得。