本文重點
香港浸會大學尋日喺灣仔會議展覽中心筵開七十席，賀校長吳清輝月底榮休，若果以八百蚊一位成本計算，埋單找數最少要七十萬，邊個負責找數呢？據聞教職員每位收四百，學生就收二百，餘數由學校一個Private Fund（私人基金）支付。雖然Private Fund同公帑無關，但啲錢大部分都係嚟自外界善長捐助。
不過，吳校長擺榮休晚宴，又冇理由要佢出錢賀自己嘅。問過喺晚宴現身嘅會計師李家祥同身為浸大諮詢會榮譽委員嘅協成行集團董事總經理方文雄，兩人異口同聲話如果學校要佢哋幫手，佢哋好樂意贊助晚宴喎！
同羅范亦師亦友
無論如何，尋日場榮休晚宴星光熠熠，港區全國人大代表羅范椒芬等都有現身撐場。原來羅范做過吳校長嘅學生，兩個人亦師亦友，吳校長當年仲幫過羅范手推動兩文三語添！