近呢幾年內地乜都炒一餐，「鮑魚之父」楊貫一爆料，話溫州人唔單止嚟香港炒樓，仲炒貴晒啲鮑魚。以十頭鮑為例，舊年每斤叫價只係兩萬蚊，如今已升至每斤三萬六千蚊；阿一珍藏嘅五頭鮑，更由十年前兩萬蚊一斤，升到依家嘅五萬蚊。難怪佢話：「以前食鮑魚好似咬魷魚，依家就係咬黃金！」
如果要喺阿一間飯店歎一客五頭鮑，冇兩萬蚊都落唔到樓，但內地豪客面不改容，分分鐘仲柯打多一支幾萬蚊嘅1982年Lafite Rothschild法國紅酒送鮑魚。班豪客食之餘仲幫手「炒」埋一份，會派專人去盛產上等鮑魚嘅日本，鬥快搜羅靚鮑魚。
中國人為鮑魚瘋狂，連世界御廚級名廚都話想見識吓，八月將訪問香港，一哥係世界御廚香港區代表，一於煮最撚手嘅溏心鮑魚，畀老外名廚大開眼界。
阿一教路，煮鮑魚必用瓦煲，香味會分外濃喎！煮鮑魚材料亦唔慳得，先將鮑魚用凍水浸過夜，煮時用排骨湯包墊底，鮑魚放中間，面層放上嫩雞湯包，再倒入上湯。