Ronald尋日同勞工及福利局政治助理莫宜端一齊上電台節目解構起錨騷，原意係為煲呔曾護航，但免不了不停咁畀主持揶揄起錨變拋錨，不過Ronald仲未識變通，一開口就夾着脷，主持要求佢示範叫起錨口號時顯得不情不願，最後要莫宜端出嚟打圓場。

當大家期待佢哋會好似煲呔曾咁擘大喉嚨不停嗌起錨之際，佢哋只係一齊叫咗一聲就收口。Ronald仲話唔好叫太多次，免得晨早流流嚇親聽眾。吓！佢咁講咪即係柴煲呔曾台，話佢猛嗌起錨會嚇親啲市民？

跟住佢仲一錯再錯。煲呔曾前晚喺facebook發表反擊激進反政改人士表現嘅文章，但佢嘅網誌並冇同步更新，Ronald當然會畀人質疑可能做漏嘢。點知佢為自己護航時，竟然話睇煲呔曾網誌嘅人一定少過睇facebook嘅，變相踩煲呔曾網誌冇人睇。雖然佢即刻補飛指依家政府諗住主攻facebook做推廣政改嘅平台，但已經無補於事。

暗寸「恩人」莫宜端

對於畀人鬧爆嘅起錨傳單設計，主持打算畀個機會佢解釋吓，但Ronald唔知有心定冇意，話設計反映「香港紅白藍精神」，當堂畀主持寸佢暗示向內地「朝貢」，但佢完全唔識反應，只識喺廣大聽眾前口窒窒。

係咁講錯嘢，莫宜端幫佢解圍話紅白藍膠袋代表香港人務實態度，算係勉強過到關，但佢似乎唔係幾識報恩，之後講開激進嘅「80後」示威者時，好強調自己係「如假包換嘅80後」，搞到身為「70後」嘅莫宜端非常尷尬。講多錯多，睇嚟Ronald要花多啲心機去融入政府呢個熱廚房喇！

講多樣嘢畀大家知，我哋發現Ronald尋晚將煲呔曾嘅facebook同網誌同步更新。但咁有乜用吖，硬係要畀人窒完先識得補鑊。