死者生前曾經寫過一首詩，形容地下六合彩嘅禍害：「範圍之大實可怕，彩民之多遍天下；一期就是幾千萬，暗流滾滾抽萬家。」老實講，首詩就寫得麻麻，但總算講出彩毒嘅可怕，可惜吖，佢識寫詩唔識避禍，明知前面係火坑，仲要踩落去，卒之一失足成千古恨，令人唏噓不已。話時話，內地受到彩毒禍害而傾家蕩產、家破人亡嘅悲劇，可以講無日無之，多不勝數，呢位迷彩服男子只不過係冰山一角嘅咋。

歸根究柢，港產六合彩報荼毒同胞，火上加油，根本就係罪魁禍首。喺內地，六合彩報屬於非法刊物，本應見一份沒收一份，但奇怪嘅係，咁多年來呢啲非法刊物居然可以賣通街，從未間斷過。舊年六月，深圳警方曾搗破一宗走私三十萬份港產六合彩報紙案件，並揭發每逢香港六合彩開彩翌日凌晨，都係走私六合彩報嘅黃金時間。本報記者仲發現，港產六合彩報除咗以「打游擊」方式零售，仲設有唔少銷售「暗點」，甚至明目張膽喺街頭散貨添。正如有人話齋，六合彩報喺香港合法印刷，非法出境，喺內地就變成非法入境，「合法」販賣，問你服未。

當斷不斷，必受其亂。不法之徒愈來愈猖狂，內地當局視若無睹，搞到六合彩報遍地開花，非法販售管道已發展到互聯網一條龍服務。有人甚至利用高科技，設立隱形網站，提供所謂「秘碼」，令港產六合彩報喺內地開枝散葉，彩毒遍及神州大地，為禍千家萬戶。

冤有頭，債有主。講到六合彩報為禍神州，香港淫賤黎可以話居功至偉，佢旗下公司曾經承印《創富》、《貼士皇》及《六合皇》三份六合彩報，而呢三份六合彩報正正係「走私常客」。奇就奇在，呢三份六合彩報最近聲稱已改為另一間公司承印，但呢間公司居然話自己唔係印刷廠，而官方註冊嘅承印人仍然係淫賤黎擔任董事嘅公司，有人神神秘秘，鬼鬼祟祟，唔通敢做唔敢認？

同樣奇怪嘅係，呢三份六合彩報承印人登記資料不盡不實，疑竇多多，有違反《本地報刊註冊條例》之嫌，而負責監管嘅影視處居然烏吓烏吓，有人舉報先至識做嘢，佢哋到底係真唔知定扮懵？港產六合彩報源源不絕走私北上，搞到內地賭禍氾濫，烏煙瘴氣，港府執法不力，井水犯河水，簡直係靠害同胞。

叮，國之將亡，必有妖孽。有人懷疑六合彩報走私集團有內地執法部門作後盾，甚至有軍方背景嘅保護傘，睇嚟唔係冇道理㗎。試諗吓，家陣連紅色搖籃井岡山亦獨沽一味喺反中亂港嘅爛果報上登廣告，有人敵友不分，認賊作父，仲有乜嘢事做唔出吖！

計太一叮話齋，只要走私六合彩報嘅幕後黑手繼續逍遙法外，包庇洋奴漢奸嘅保護傘繼續存在，神州咪話和諧社會無望，睇怕遲早連江山都變埋色添。叮！