小白觀點:女人化妝品錢易賺

一份全球商舖市場研究報告指出，香港銅鑼灣羅素街嘅商舖，平均呎租約七百八十四元，係全球第三貴租，真係唔講得笑，據說係一間化妝品公司創下嘅紀錄。

恕小白老弟孤陋寡聞，呢份報告真係令人有啲i頭喎，我一直以為賣魚蛋滷味呢啲快來快去、薄利多銷嘅嘢至可以撐到癲價租，勢估唔到連化妝品都咁賺錢。

據講一個八百八十方呎嘅商舖月租要七十六萬元，仲有燈油火蠟人工，到底賣幾多化妝品先至可以為到皮呢？唔通近年嚟女人面部嘅實用面積大增十倍，由「湯碗面」變成「泳池面」，每日至少要用幾加侖嘅潔面乳液洗面、要出動三公噸嘅粉底加四吋厚嘅批盪至出得街？嘴唇仲厚到呢，要成碌巡航導彈咁長嘅唇膏至可以畫得晒？各位女士們，可唔可以解答我嘅疑惑呢？不勝感激呀！

Blog:http://sunsiupak.blogspot.com

阿豪觀點:紐倫港排名應執位

一項研究發現，今年首季香港舖位呎租排行全球第三位，僅次於悉尼同紐約，其中銅鑼灣羅素街商舖呎租錄得約七百八十四元。咦，香港舖位租金咪仲厲害過倫敦？照咁睇，紐倫港嘅排名應該執一執，叫做紐港倫至啱喎……

咪住，香港舖租達到世界水平，聽講未來一年仲會再上升百分之十添，咁咪又有大條道理再壓低最低工資？不過諗諗吓其實都算幾好㗎喇，冇錯舖租係貴，但係關豪伯呢類小民咩事呢？又冇話行嗰條街要收入場費，等我去啲名店度，叨吓啲有錢同胞光都好！

吖，真係愈諗愈過癮。其實除咗名店街舖租列全球三甲之外，咪睇銅鑼灣、旺角等區賣魚蛋小食嘅舖位細細哋，除番開租金之高，都係世界知名㗎！魚蛋幾蚊串，豪伯都買得起，一於下次同人講，話去「全球最貴舖租嘅商店掃貨」，你都咪話唔有氣勢！

Blog:http://lukchiho.blogspot.com

網友觀點

賓　仔：睇吓領匯啲租戶牙痛咁聲，就知呢份報告有料到。

夢露哥：超貴舖租粉碎咗唔少人嘅創業夢！

小　新：小商戶想生存只好向樓上發展喇！

工人甲：老闆話自己捱緊貴租，加人工要遲吓先。