煲呔曾自把自為單挑公文袋黨魁余若薇辯論政改，畀立法會金融服務界議員「金勞詹」詹培忠在內嘅一班建制派狠批，但煲呔曾死牛一邊頸，辯論就唔取消㗎喇，反而約金勞詹禮拜四去禮賓府食晚飯拉關係。
「何苦抬高余若薇？」
金勞詹喺席間再次當面告誡煲呔曾取消場辯論，仲話：「（辯論）畀盡你冇輸冇贏，但係就抬高余若薇，何苦呢？」好明顯金勞詹係話煲呔曾搞呢場電視辯論相當之不智。言猶在耳，政府尋日進一步公布辯論安排詳情，即係話，煲呔曾又再忠言逆耳，當金勞詹嘅勸告係耳邊風。
若呢次政改方案再次被否決，煲呔曾分分鐘要提早執包袱，金勞詹就引述煲呔曾話退休後要安享晚年，乜都唔做喎！