前房屋及規劃地政局常任秘書長梁展文喺○八年退休，諗住轉投新世界中國地產，當時嘅發展局常任秘書長麥齊光力排眾議，直指梁展文咁樣做會引起「公眾觀感問題」，簡直就係眾人皆醉佢獨醒。
轉眼到麥齊光退休，人稱「崩牙光」嘅佢話嚟緊幾年又要繼續幫政府手睇住四川重建工程，又要返大學教書，又要做義工，又要去旅行，總之有排忙。睇嚟佢唔會搵工做，係咪怕重蹈梁展文覆轍呢？
崩牙光尋日退休前同傳媒茶敍，問番佢點睇梁展文事件，佢話要講嘅都喺立法會講晒。崩牙光打咗三十幾年政府工，有二十幾年喺鐵路部做，一九七六年一場大雨，沖爛咗橫跨城門河火車橋，佢有份將收埋喺政府倉底嘅鐵橋攞番出嚟應急，再加上新建嘅石屎橋，六個禮拜就火速起番條新火車橋。講得興起，佢重攞番啲陳年舊相出嚟同大家分享。
講到佢個朵原來都有段古㗎！原來佢喺七九年起畢架山隧道爆石屎時，畀粒石屎飛中，撞崩門牙，咪變咗崩牙光囉！