行政會議成員尋日舉行午宴，胡文新都參加埋一份。講起世界盃，原來每晚有三場直播，佢都瞭如指掌。佢話雖然自己冇特別捧邊隊，但預咗減少夜晚應酬睇波；至於睇邊場，就要睇每場嘅戲碼喇。梗係啦，佢似足爸爸胡應湘咁熱愛足球，細個都有踢波，中場、後衞同龍門都打過。

轉頭喺門外遇到青年事務委員會主席陳振彬，佢自爆細個時熱愛足球，因個子高大，所以負責守龍門。咁會唔會去南非現場欣賞世界盃，佢擰頭話唔會。原來佢去過南非，所到之處都畀人上下打量，感覺麻麻哋，所以寧願留喺香港睇電視。佢仲透露有抗眼攰絕招，就係自備眼藥水，睇到眼攰時滴幾滴，即時醒神晒！