政改方案喺本月二十三號提交立法會表決，立法會秘書處預咗陪官員同議員玩足三日，有建制派嘅資深議員估計三日係最悲觀預算，兩日啦，政改命運應可揭盅。而喺呢兩個夜晚，立法會大樓外嘅「80後」應該會好似英國球迷睇完波散場咁，激動情緒醞釀爆發，大樓隨時再變圍城。
年初高鐵撥款觸發反高鐵示威者重重圍堵立法會，十九名建制派議員同運輸及房屋局局長鄭汝樺被迫退守議事廳，斷水斷糧落難六粒鐘，大家仲記憶猶新。面對今次政改大戰，建制派唔敢輕敵，據了解，佢哋已督促秘書長吳文華同警方商討「守城」安排。
首先，就係儲定糧水打持久戰，萬一要喺大樓過夜，都唔會有人捱飢抵餓。第二，預先度定「逃生」路線，反高鐵一役建制派夜遁地鐵，今次班「80後」可能連地鐵都想堵塞，警方要做定工夫，萬無一失。最搞笑係，有建制派話上次坐困圍城時，有泛民議員出入大樓探望，根本以慰問為名，助樓外示威者刺探軍情為實，所以建制派建議「逃生」路線除不可外洩，亦要「對內」保密。