其實，好多政界人士都打定輸數，唱晒淡風話政改方案通過嘅機會好微，而煲呔曾不停咁搞政治騷，都係想借民意牌逼泛民轉軚，所以各問責官員出席任何場合都要同政改扯上關係，統一口徑爭取支持政改。

唐唐以起樓喻政改

正如首席推銷員、政務司司長唐唐尋日喺一個建造業嘅展覽上致辭時，亦借題發揮話政制好比建造樓宇，正所謂萬丈高樓從地起，要打好根基，拾級而上，如果只顧喺地盤七嘴八舌，空談空中樓閣嘅美好，係永冇成功嘅一日，最終只會延誤工程，增加成本，趕工亦會影響工程質量。跟住佢又呼籲各黨派順應民意，求同存異，支持政改方案。

唐唐好明顯係按本子辦事，而商務及經濟發展局局長劉吳惠蘭都交足戲，尋日喺另一個場合畀記者問到夜晚會唔會落區宣傳政改方案，佢好興奮咁話：「隨時準備好起錨。」

證曾班子唔夠團結

表面上，問責團隊似乎好齊心咁，但竟然露底喎！話說財經事務及庫務局局長「傻強」陳家強，尋日喺一個會計界嘅午餐會時話，相信今次政改方案通過嘅機會唔大，仲話政改係回歸以嚟最重要嘅議題，影響深遠，如果通過到政改方案，政府就可以專注處理社會同經濟問題。

嘩！有冇搞錯？煲呔曾團隊爭取支持通過方案搞到火紅火綠，傻強竟然唔按本子辦事，偏離主調、逆市率先唱淡，擺明倒煲呔曾米啫！再換個角度講，傻強呢句話可能係佢嘅心底話，咁就反證煲呔曾搞「起錨」實質係「拋錨」，搞咁多嘢只不過係做騷。