當局所謂「居家安老為本、院舍照顧為後援」嘅安老政策，擺明想推卸責任。尋日有立法會議員就資助安老宿位問題「抽秤」勞工及福利局局長張建宗，要求佢交代輪候期間長者死亡嘅數字。張建宗承認，舊年喺輪候資助護養院、護理安老院宿位期間離世長者人數，分別係一千八百幾同二千七百幾人。

叮！超過四千五百位公公婆婆抱憾離世，佢哋要求嘅不過係老有所棲、老有所護，任何一個政府都有義務去滿足佢哋，等老人家可以有尊嚴咁走完人生最後一程。但港府喺呢方面令人完全失望，唔怪得張建宗畀議員大鬧「面皮厚、不仁不義」啦。

當局仲死撐，話唔係每位有長期護理需要嘅長者都一定要入住安老院；跟住畫公仔畫埋出腸，話即使入住院舍，亦唔一定要係資助宿位，只要有足夠社區支援，長者可以留喺屋企安老喎。不如索性講「話之你死，唔關我事」啦！

查實，所謂「社區支援」根本滿足唔到長者需要。張建宗自己都承認，目前輪候緊資助宿位嘅二萬五千幾位長者入面，約有五成半接受緊政府援助同服務。先唔好計呢啲支援有冇「水分」，家陣四成五輪候宿位長者得唔到幫助，淨係呢樣當局已經唔合格啦！

現時政府提供嘅資助安老宿位有約二萬六千個，所服務長者數目約佔全港居於安老院長者四成四，即係超過一半呢類長者只能選擇監管似有若無、服務質素參差，甚至屢次爆出虐待院友醜聞嘅私營安老院。政府呢方面係「肥佬」！

點解決？當局話未來三年會新增約千五個資助宿位供長者使用，但係家陣輪候資助護養及護理宿位嘅長者加埋超過二萬六千人，每年加得嗰五百個位，根本係遠水救不了近火。

百行以孝為先，呢方面政府更要帶頭，第二樣可以慳，安老服務資源絕對唔慳得。至弊政府掉轉嚟，對安老服務鬼咁孤寒，其他地方就亂咁Fing錢。

嗱，一年使幾千萬請班縮頭烏龜副局長同政治助理，眼都唔眨下；冇嗰樣整嗰樣，用六百萬搞個「新飛龍」標誌，結果仲「樣衰」過舊標誌；推動政改整色整水，「起錨」變跪低，支持者不升反跌，仲話係預留咗九百萬嚟宣傳，你話係咪為官不仁，勞民傷財吖！

政務司司長唐英年尋日話，到二○三一年全港四分一人口超過六十五歲，非常關注人口老化問題，仲話要推廣「尊老愛幼」傳統價值。家陣資助宿位了無期，居家安老變等死，提供足夠資助安老宿位先啦，仲講咁多廢話。叮！