其他議員有牢騷

話說立法會有一個慣例，會將所有補選入會嘅議員當係新議員，即係當佢哋從來冇喺議會度發過言。因為較少發言嘅議員係有發言嘅優先權，所以公投五子變相可以喺會議上打尖，搶先發表偉論。尋日立法會嘅六條口頭質詢，就有兩條只係得公投五子發言，由於佢哋往往滔滔不絕，所以其他議員排極隊都冇機會講，令佢哋有唔少牢騷。

勞聯議員李鳳英話唔少議員都好關心議會討論嘅議題，如果畀公投五子有呢一個特權，就即係剝削咗其他人嘅發言權嘞。佢話五子只係離開咗議會一段時間，應按比例計番佢哋嘅發言次數，唔應該由零計起喎。

立法會秘書長吳文華就話，如果有議員覺得呢個安排唔公道，可以向內會反映意見，亦都可以交畀議事規則委員會修例，不過就應該趕唔切喺今年休會前完成嘞。換言之，即係公投五子喺今個會期仍然可以好似蠻牛咁亂衝亂撞，睇吓其他議員幾時會忍無可忍而發難啦！