一月立法會財委會審議高鐵撥款，連續三個周末拉鋸進行，共纏鬥二十粒鐘，政改方案表決，戰線之長肯定有過之而無不及。今個月二十三號，政府向立法會提交修改二○一二年特首及立法會兩個選舉辦法嘅決議案，按議事規則，每名議員有權發言十五分鐘，假設五十九個議員（主席不發言）都發言，就係十五粒鐘，兩個決議案合共就係三十粒鐘，官員發言更加不限時間，加上投票程序同當日大會原有嘅議程，玩足三日係基本消費。
立法會秘書處做定最壞打算，本來二十四號房屋事務委員會委員約好咗運輸及房屋局局長鄭汝樺開集思會，就最近嘅資助市民置業諮詢文件做腦震盪，不過，秘書處尋日通知委員順延至二十六號，成為預留三日表決政改方案嘅佐證。秘書處亦已通知職員，由二十三號起一連三日全民皆兵，陪高官同議員一齊捱更抵夜。
其實，外界開始落盤賭邊個泛民議員最有機會畀政府撬票，回心轉意支持方案，一向語不驚人誓不休嘅詹培忠尋日喺立法會走廊話，今次形勢明顯，一係泛民綑綁策略成功，二十三票一齊反對，一係就普選聯嘅十四票集體歸邊，方案以五十票高票通過，佢仲預言二○二○年普選立法會時，功能組別仍然存在咁話。大家即管睇吓佢嘅水晶球有幾靈驗。